【性暴力就該被譴責】
我實在理解唔到點解有人會覺得：
「睇全相咋嘛」「拍下個胸咋嘛」「又唔係強姦」
然後會覺得性暴力其實no big deal。
無論程度大小，性暴力就係性暴力。
分享一件我親身的經歷：
十六歲嗰年同朋友一齊貪玩去咗麥記做暑期工
有日做做下野，當值經理（四十幾歲大叔）同我講：
「喂，其實你把聲呢，真係好似AV」
當時嘅我真係受驚，呢句說話我覺得好難聽好難聽！
而中學嘅我一直有個志願係做DJ，竟然畀人話似AV聲⋯
往後好多年我都對於自己把聲有種莫名討厭
甚至我有啲羨慕其他女仔好man嘅老牛聲。
直到後來我入咗電台做幕後，
有日有個DJ前輩同我講：你把聲其實幾好聽
然後仲因此有幸做到一個聲音專欄⋯
我先真正擺脫到AV聲嘅陰影，往後無再覺得自己把聲好羞家
當然，對於今日廿八歲嘅我嚟講
你再話我把聲似AV/個樣似AV/定話我係臭雞
我都唔會因此而難過到瞓唔著，更唔會因此否定自己。
但係對於十六歲嘅我，AV係萬惡之源、淫邪之物
你想像唔到對於當時發DJ夢嘅單純中學生嚟講
呢句說話係足足影響咗我往後十年對自己嘅觀感！
只係一句戲言，掂都無掂過我
但我可以話你知，呢種暴力嘅程度絕對唔細！
無論程度大小，性暴力就係性暴力。
傷害係無得量度，
作為旁觀者，你又有咩資格去否定當事人嘅感受呢？
提提你，你講呢啲說話時，
企緊嘅並非「道德高地」，而係「道德深淵」。
不如將個Focus放番喺加害者身上
15歲彥霖遺體已經被光速火化啦，
你仲嘥時間係二次傷害受害人身上，
只係畀加害者有更多時間去脫罪去做更多壞事。
IG：@hkgirlfriend
FB：港女友
Search